قانونی سہارے کی بجائے پی آئی سی پر حملہ شرمناک: پروفیسر ساجد میر

لاہور(م س) مرکزی جمعیت اہل حدیث پاکستان کے سربراہ سینیٹر علامہ ساجد میر نے کہا ہے کہ ’’وکلاء کے پاس پی آئی سی پر حملے کا کوئی جوازنہیں تھا۔ انسانیت پامال ہوئی، حملہ قابل مذمت اور شرمناک ہے۔ دوسروں کو قانون کی بالادستی کا درس دینے والوں نے قانون کی دھجیاں بکھیر دیں۔ ڈاکٹرز کے خلاف قانونی جنگ لڑنے کی بجائے ہسپتال کو میدان جنگ بنانا کہاں کی اخلاقیات ہے۔ حملے میں ملوث عناصر کو قانون کے سخت شکنجے میں کیفر کردار تک پہنچایا جائے ورنہ کل کو کسی کی بھی پگڑی‘ گریبان اور عزت کے محفوظ ہونے کی ضمانت فراہم نہیں کی جاسکے گی۔‘‘

یہ خبر پڑھیں:  ملک ریاض کو NRO اور پشاور میٹرو منصوبہ کرپشن

جامعہ ابراہیمیہ میں جمعہ کے اجتماع سے خطاب کرتے ہوئے علامہ ساجد میر کا کہنا تھاکہ  ’’پڑھے لکھے طبقات میں عدم برداشت اور بڑھتے ہوئے تشدد کا رحجان اخلاقی گراوٹ کی بدترین مثال ہے۔ وکلاء کا پی آئی سی پر حملہ حکومت اور انتظامیہ کی غفلت اور بے نیازی  کا شاخسانہ ہے۔ اشتعال انگیزی کو برقرار رکھنے  والے وکیل اور ڈاکٹرز کو بھی کٹہرے میں لانا چاہیے۔ یہ بلاشبہ حکومتی رٹ اور گورننس کا بھی سوال ہے جس کا فوری سدباب نہ کیا گیا تو کل کو کوئی بھی طبقہ یا گروہ کسی معمولی بات کو جواز بنا کر تشدد کا راستہ اختیار کر سکتا ہے۔ اگر اس صورتحال میں خانہ جنگی کی فضا سازگار ہوگئی تو پھر حکومتی رٹ جابجا چیلنج ہوتی نظر آئیگی اس لئے اب بھی وقت ہے کہ فہم و تدبر سے کام لے کر صورتحال میں مزید بگاڑ پیدا ہونے سے روک لیا جائے۔ اس کیلئے حکومت کے ساتھ ساتھ وکلاء اور ڈاکٹر تنظیموں کی قیادتوں کی بھی ذمہ داری ہے کہ وہ اپنے چھوٹے موٹے سیاسی مفادات کے حصول کیلئے اپنے اپنے لوگوں کو تشدد کے راستے پر چلانے سے گریز کریں اور پی آئی سی پر حملے کے واقعہ کو مثال بنا کر آئندہ ایسے واقعات کے سدباب کیلئے ٹھوس اقدامات بروئے کار لائے جائیں۔‘‘